Agosto é un dos meses con máis actividades e eventos en Cervantes, así que estas datas son un bo momento para visitar o noso municipio. O verán enche de actividade os nosos pobos e parroquias, cunha programación que combina tradición, deporte, festas, natureza e cultura, convertendo o municipio nun punto de encontro para a veciñanza e para todas as persoas que escollen os Ancares como destino das súas vacacións.
A axenda do Concello inclúe propostas para todos os públicos, aquí van algunhas das opcións que tes para estes días:
- 6 de agosto – Marcha e observación do ceo nocturno. Entre as primeiras citas, unha oportunidade perfecta para descubrir a espectacular calidade do ceo de Cervantes, un dos grandes atractivos do noso territorio, especialmente neste ano marcado pola expectación xerada arredor da eclipse total de Sol do 12 de agosto.
- 7 de agosto – Festón en Quindous. Misa solemne, sesión vermú, pulpo, tardeo, verbena e moita música!
- 8 de agosto – Festas en Dumia. Misa, sesión vermú, concurso, xogos tradicionais, degustación de mel, música e festa rachada ata que o corpo aguante.
- 9 de agosto – Pola mañá en Piornedo a ruta o reló dos bois, con Piornedo Anda e percorrendo diferentes puntos do municipio, a Ancares Cycling Marathon. E despois, un bo tardeo de verán en San Román con hinchables acuáticos, actuación en directo e máis sorpresas.
- 10 de agosto – Xuntanza na honra de San Lourenzo en Piornedo. Misa solemne, sesión vermú, polbo á feira e churrasco, sesión de tarde e sesión nocturna.
- 12 de agosto – Un día histórico coa eclipse total de sol e aproveitando que estamos en zona de visibilidade total, seguro que será un momento inesquecible. Ademais da andaina de verán que organizan os veciños de Balgos, desde a ANPA do colexio de Cervantes están preparando unha xornada de xogos tradicionais e hinchables de auga.
- 13 de agosto – En Piornedo haberá un taller de orientación na natureza, para aprender técnicas básicas e tamén para facer un pequeno recorrido por diferentes localizacións.
- 14 de agosto – Festa en Padornelo. Misa campestre, sesión vermú, festa e verbena.
- 15 de agosto – Grandes festas en Vilarello. Pasarrúas, misa, sesión vermú, tarde tradi, campeonato de tortilla, baile, verbena e disco móvil.
- 21 de agosto – Festa en Catroventos. Boliños preñados, actuación de Dúo Dilema e festa rachada con LouBand e DBC Disco Movil.
- 22 de agosto – XIX Festa da Pandeira, encontro de tocadoras en Piornedo. Cursos de iniciación ao baile de Ancares e ao toque de pandeira, coloquios, exposición de pandeiras da Península, sesión vermú, actuacións, concertos, cea e polavila.
- 24 de agosto – Festas en Santalla. Misa solemne, sesión vermú e pola noite verbena!
Desde o Concello animamos tanto á veciñanza como ás persoas que nos visitan a participar nesta programación e a aproveitar a ocasión para descubrir todo o que ofrece Cervantes: o Castelo de Doiras, as Pallozas de San Román, as rutas de sendeirismo, a gastronomía local e unha contorna natural privilexiada no corazón dos Ancares.
Podes consultar toda a programación actualizada e os detalles de cada actividade na axenda da web municipal, facendo clic aquí.
