Esta mañá participamos na presentación oficial da Ancares Cycling Marathon, unha proba deportiva que se consolidou nos últimos anos como unha das citas máis importantes do ciclismo de estrada en Galicia e como o gran fondo de alta montaña de referencia da nosa comunidade.
O 9 de agosto de 2026, a carreira volverá converter as estradas dos Ancares nun escenario excepcional para centos de ciclistas chegados de diferentes puntos de Galicia e doutras comunidades autónomas. A combinación de paisaxes espectaculares, portos de montaña esixentes e unha organización consolidada fan desta proba unha experiencia única tanto para os participantes como para as persoas que se achegan a desfrutala.
Nesta edición, a organización ofrece dous percorridos adaptados a diferentes niveis de preparación. O trazado de Gran Fondo contará con 125,12 quilómetros e un desnivel positivo acumulado de 3.218 metros, un auténtico desafío para os amantes da alta montaña. Pola súa parte, o percorrido de Medio Fondo terá unha distancia de 86,08 quilómetros e un desnivel positivo de 1.928 metros, permitindo que máis afeccionados poidan formar parte desta experiencia.
Desde o Concello de Cervantes consideramos que a celebración dunha proba destas características é unha magnífica oportunidade para dar a coñecer o noso territorio. Os participantes e acompañantes teñen a ocasión de descubrir a riqueza paisaxística, natural e patrimonial da nosa montaña, contribuíndo ademais á dinamización económica da zona durante a fin de semana da competición.
A Ancares Cycling Marathon representa tamén unha excelente ferramenta para promocionar o turismo deportivo, un segmento que cada vez ten máis relevancia e que encaixa perfectamente coas características do noso concello. As estradas de montaña, a beleza das paisaxes e a tranquilidade do entorno converten Cervantes nun destino ideal para a práctica do ciclismo durante todo o ano.
Por todo isto, é un orgullo para nós que unha proba deste nivel teña a Cervantes como un dos seus principais escenarios e que contribúa a situar o noso concello como un referente no ciclismo de montaña e nas actividades deportivas vinculadas á natureza.
Queremos felicitar á organización polo traballo realizado para consolidar esta cita deportiva e animar a todas as persoas afeccionadas ao ciclismo a coñecer de preto esta experiencia.
Toda a información sobre percorridos, inscricións e novidades da proba está dispoñible na páxina web oficial da Ancares Cycling Marathon.
