O alcalde de Cervantes, acompañado de dous concelleiros, mantivo unha reunión coa presidenta da Confederación Hidrográfica do Cantábrico, Bárbara Monte, así como con Alejandro Barriuso, comisario de Augas, e Esperanza Martínez, xefa da Área de Xestión do Dominio Público Hidráulico.
Foi un encontro de traballo produtivo, no que se abordaron diferentes cuestións de interese para o municipio e se trasladaron as inquietudes da veciñanza en relación coa conservación e o uso responsable dos nosos recursos hídricos. O alcalde destacou a importancia de que a Confederación mire polos nosos ríos, pois son un recurso natural prioritario e unha das grandes fontes de riqueza de Cervantes.
Os ríos vertebran o territorio, alimentan os montes e os prados, e sosteñen boa parte das actividades tradicionais, como a gandaría ou a agricultura. Ademais, teñen un papel esencial na conservación da biodiversidade e na atracción de visitantes que buscan desfrutar dunha natureza auténtica e ben coidada. Manter os ríos limpos, accesibles e vivos é tamén apostar polo futuro do noso rural.
Durante a reunión, o Concello solicitou á Confederación que simplifique os trámites administrativos, para que a veciñanza poida facer as súas xestións con maior facilidade e sen tantos obstáculos. A idea é que quen vive no rural non teña que atopar máis barreiras á hora de realizar actuacións necesarias e responsables no seu entorno.
Desde o Concello de Cervantes seguimos traballando para mellorar o día a día da veciñanza, coidando do noso patrimonio natural e facendo que a voz do territorio chegue ás administracións competentes.
