Dende o 1 ata o 15 de setembro de 2025, ambos inclusive, permanecerá aberto o prazo para que os cazadores locais interesados poidan presentar a súa solicitude para participar nas esperas ao xabaril por danos na agricultura dentro da Reserva Nacional de Caza dos Ancares e no refuxio de fauna de Piornedo.
A convocatoria está dirixida exclusivamente a persoas con residencia administrativa en lugares con terreos dentro destes espazos naturais.
Onde conseguir os modelos de solicitude
As solicitudes estarán dispoñibles en diferentes puntos:
- Casa do Concello de Cervantes.
- Servizo de Patrimonio Natural (tamén se poden pedir no correo: patrimonionatural.medio-ambiente.lugo@xunta.gal
- Oficina do Servizo de Patrimonio Natural en Becerreá (Distrito Ambiental VII: Fonsagrada-Os Ancares, Rúa Ano Vello s/n).
- A través dos vixiantes de recursos naturais da Reserva.
Como presentar as solicitudes?
As persoas interesadas deberán rexistrar a súa solicitude dentro do prazo establecido, podendo facelo:
- Por vía electrónica na Sede Electrónica da Xunta de Galicia, a través do procedemento MT720P, dirixido ao Departamento Territorial de Lugo da Consellería de Medio Ambiente e Cambio Climático.
- Presencialmente nas oficinas de rexistro da Xunta, no rexistro do Concello de Cervantes ou en calquera outro rexistro público habilitado. Podes descargarte o modelo de solicitude aquí.
Cada cazador poderá presentar unha única solicitude, indicando lugar e parroquia de interese. Será necesario achegar certificado de empadroamento expedido polo Concello correspondente.
Vixencia das autorizacións
Ata que se publique a relación de cazadores locais admitidos para a tempada 2025/2026, manterase a validez das autorizacións da tempada anterior (2024/2025). Do mesmo xeito, a listaxe definitiva desta nova tempada estará en vigor ata a publicación da correspondente á tempada 2026/2027.
Unha medida para protexer a agricultura
Estas esperas teñen como finalidade controlar os danos que provoca o xabaril nos cultivos da zona, compatibilizando a conservación dos espazos naturais cos intereses do sector agrogandeiro e a veciñanza local.
