O alcalde de Cervantes acompañou hoxe á presidenta da Deputación de Lugo e ao secretario xeral para o Reto Demográfico nunha visita polo noso territorio que serviu para dar a coñecer algúns dos proxectos, iniciativas e entidades que están a contribuír a construír o futuro do noso rural.
A xornada permitiu mostrar de primeira man a realidade de Cervantes, un concello que, malia os desafíos propios da montaña e da dispersión poboacional, conta cun tecido social, económico e asociativo dinámico e comprometido co desenvolvemento do territorio.
Un dos momentos centrais da visita foi o encontro coa Cooperativa A Carqueixa, onde o seu presidente e o seu xerente explicaron os proxectos nos que a entidade está a traballar actualmente. A cooperativa continúa a ser un referente para o sector gandeiro da comarca e un exemplo de como a unión e o esforzo colectivo poden xerar oportunidades de desenvolvemento económico e social.
Especial relevancia tivo a recuperación do Hostal Belón, unha iniciativa que abre novas posibilidades para a dinamización da zona e que permitirá impulsar actividades vinculadas ao sector agrogandeiro, á formación e ao desenvolvemento rural. Desde o Concello queremos trasladar a nosa máis sincera noraboa á Carqueixa por facer realidade este proxecto e por seguir apostando polo futuro de Cervantes.
Durante a visita tamén estiveron presentes representantes de diversas entidades que desenvolven un papel fundamental na vida do municipio. Organizacións como a Asociación Ser, a Asociación de Apicultores de Cervantes, o CDR Ancares ou Teitos de Piornedo tiveron a oportunidade de explicar o traballo que realizan e os proxectos que impulsan para mellorar a calidade de vida da veciñanza, conservar o patrimonio e crear novas oportunidades no rural.
Desde a Alcaldía aproveitouse esta visita para trasladar ás distintas institucións as necesidades e inquedanzas do noso concello, así como para poñer sobre a mesa os retos que debemos afrontar nos próximos anos. A mellora dos servizos, a creación de oportunidades para a mocidade, o apoio ao sector primario e a loita contra o despoboamento continúan a ser cuestións prioritarias para o futuro de Cervantes.
Ao mesmo tempo, reiterouse a disposición do Concello para colaborar con todas aquelas administracións, entidades e persoas que queiran contribuír ao desenvolvemento do territorio. O futuro do rural constrúese desde a cooperación, o diálogo e o traballo compartido.
Desde o Concello queremos agradecer o labor dos cooperativistas da Carqueixa, dos gandeiros e gandeiras, das asociacións, das empresas locais e de todas as persoas que apostan por vivir, traballar e emprender en Cervantes. Son elas, que co seu esforzo diario, manteñen vivo o noso concello e demostran que o rural ten presente e, sobre todo, ten futuro.
