A vespa velutina converteuse nos últimos anos nunha das pragas máis perigosas para o noso ecosistema. A súa presenza supón unha grave ameaza para as abellas, que son esenciais para a polinización e para o mantemento da biodiversidade, pero tamén pode provocar problemas para outros animais e mesmo riscos para as persoas. Por iso, a loita contra esta especie invasora é unha tarefa que nos corresponde a todos e todas, como comunidade.
Se tes localizado un niño de velutinas, é fundamental que deas aviso canto antes. Podes facelo chamando ao teléfono 012, onde recollerán a túa alerta e se encargarán de activar o protocolo de retirada. Sen embargo, existe unha alternativa aínda máis rápida e sinxela: a través da web https://012.xunta.gal/vespa-velutina
O funcionamento é moi doado: só tes que premer na bola azul que aparece na parte inferior da pantalla e abrirase unha conversa interactiva. Nela iranche facendo unha serie de preguntas ás que deberás responder, para facilitar a localización exacta do niño e poder organizar a súa eliminación. Deste xeito, axilízase a resposta e conséguese unha maior eficacia no control desta praga.
É importante estar especialmente atentos cando empece a caer a folla das árbores, momento no que os niños de velutinas resultan máis visibles. Lembramos que non debes tentar retiralos pola túa conta, xa que pode ser perigoso. O máis seguro e responsable é dar aviso polas canles oficiais.
A velutina é un problema importante, e só coa colaboración da veciñanza poderemos frear o seu avance. Cada aviso conta, cada ollada atenta suma. A loita contra esta praga depende de todas e todos nós.
