Desde o Concello de Cervantes temos o pracer de convidarvos a todas e todos á inauguración oficial do Castelo de Doiras, un evento histórico e especial que marcará unha nova etapa para este elemento crucial do noso patrimonio.
O próximo domingo 30 de marzo ás 12:00 horas, xuntarémonos no castelo para celebrar que este monumento, cargado de historia e simbolismo, pasa a ser un ben público.
Despois de séculos de existencia, o Castelo de Doiras pertence agora ao Concello de Cervantes, a todos os cervantegos e cervantegas, e por extensión, a todas as galegas e galegos que queiran achegarse a coñecelo e desfrutalo.
Será unha xornada de celebración aberta a toda a cidadanía, na que poderemos compartir este momento histórico. Convidamos a todas as persoas, de dentro e fóra do noso concello, a acompañarnos nesta inauguración, que simboliza a posta en valor do noso patrimonio e a vontade de seguir promovendo a nosa cultura e historia.
O Castelo de Doiras, enclavado nunha paraxe de gran beleza, representa unha testemuña viva do noso pasado e agora abre as súas portas cun novo futuro por diante. Queremos que toda a veciñanza forme parte deste día tan especial, así que non dubidedes en asistir e formar parte desta nova etapa.
