Fondo cabecera Concello de Cervantes

Cómo chegar

Mapa Cervantes

A SITUACIÓN DOS ANCARES

A Serra dos Ancares localízase nas montañas orientais de Galicia, entre os límites das provincias de Lugo, León e Asturias. Todo o conxunto de macizos montañosos, ríos e fermosas paisaxes de montaña farán posible que a persoa que os visite goce dunha viaxe inesquecible.

A súa zona oriental está ocupada por parte dos municipios de Cervantes e Navia de Suarna, concretamente as parroquias de Donis, Vilarello da Igrexa, Noceda e Cereixedo.

Os Ancares tamén contan cunha vertente pertencente a León, na cal incluímos os municipios de Candín, Balboa e Villafranca del Bierzo, ademais de un tramo asturiano onde se inclúe San Antolín de Ibias.

Os cumes máis importantes da Serra son: Penarrubia (1.822 m.), Corno Maldito (1.849 m.), Tres Bispos (1.795 m.), Mustallar (1.935 m.), Penalonga (1.898 m.), Miravalles (1.969 m.) e Cuiña (1.998 m.).

ACCESOS Á SERRA DE ANCARES

Se o visitante procede de Galicia poderá chegar pola autoestrada A6 ata a saída dos Ancares continuando pola estrada de Navia ata Liber, ou ben pola N-VI dirección Madrid ata Becerreá, situado en plena estrada nacional. Aquí desviaranse pola estrada LU-722 que indica Navia de Suarna e Serra de Ancares. Logo de 9 km. chegaremos a Liber. Desde aquí temos dúas opcións:

    1. Desviarnos no primeiro cruce á dereita, tomando a estrada LU-723 que indica Serra de Ancares, Portelo, Pontes de Gatín, Doiras.
    2. Seguir pola estrada uns 200m., tomando un desvío á dereita que indica San Román de Cervantes e Piornedo.

Se nos decidimos pola primeira opción atoparemos a 1 km. un pobo chamado Pontes de Gatín, alí poderemos parar e observar unha ponte romana. Seguiremos por esta estrada que se abre camiño entre montañas, vales e bosques de castiñeiros, bordeando o río Cancelada, constituíndo un conxunto de paisaxes de gran beleza. Seguindo a estrada chegamos a Doiras onde un pouco antes poderemos divisar unha prezada herdanza da Idade Media: O Castelo de Doiras, que actualmente é de propiedade privada. A distancia de Liber a Doiras é duns 20 km. En Doiras tomamos un desvío á esquerda que indica Serra de Ancares. A distancia entre Doiras e a Campa da Braña é de 12 km.

Se pola contra optamos pola segunda posibilidade chegaremos a San Román de Cervantes (capital do municipio), neste punto poderemos visitar o conxunto etnográfico que consta dunha reconstrución das pallozas típicas da zona. Seguiremos ascendendo por esta estrada que se abre paso entre terras de labranza e bosques de coníferas, bordeando á súa vez montañas que fan posible admirar bonitas paisaxes. Chegamos así ata Degrada, onde enlazamos coa estrada local LU-7231 Doiras-Piornedo, continuando á esquerda cara a Campa da Braña. A distancia entre Liber e a Campa da Braña por San Román de Cervantes é duns 25 km.

Unha vez na Campa da Braña continuaremos a viaxe cara o Albergue ou cara Piornedo. Desde ámbolos dous puntos parten numerosas rutas de sendeirismo.

Se os visitantes proceden da meseta:

Poden acceder pola autoestrada do A6 ata a saída dos Ancares, preto xa de Becerreá e continuar ata Liber, onde teremos as dúas opcións xa comentadas anteriormente.

Tamén se pode acceder por Vega de Valcarce. Unha vez pasado este pobo, situado na N-VI, atopamos un desvío á esquerda coa indicación de Ambasmestas. Neste pobo tomaremos outro desvío cara á dereita que indica Pontes de Gatín. Continuando esta estrada (a LU-723) deixaremos á dereita un desvío que nos conduce a Balboa e ascendendo chegaremos ata o Alto do Portelo, porto de montaña no cal limitan as provincias de Lugo e León. Desde este punto continuaremos descendendo cara Doiras e neste pobo tomaremos a estrada antes mencionada para chegar á Serra de Ancares.

Cabe sinalar que durante o transcurso desta viaxe os visitantes poderán gozar de fermosas paisaxes. A distancia entre Ambasmestas e Doiras é duns 21,5 km.

Outras posibles vías de comunicación son desde Piornedo, tomando a estrada que conduce a Suárbol, pasando polo porto de Ancares, Vega de Espinareda para saír á N-VI en Ponferrada, ou ben, un pouco antes de chegar a Piornedo, deixamos o desvío que nos conduce a este e seguimos pola estrada cara Navia de Suarna pasando por Moreira, Castelo e Vilaquinte, volvendo a Becerreá pola estrada LU-722.

Enlaces adicionais

Información sobre el documento

Escudo del    Concello de Cervantes
Concello de Cervantes
C/ Deputación s/n – 27664 Cervantes - Lugo (Galicia)
Teléfono: 982 364 904 | Fax: 982 364 910
E-mail: concello.cervantes.cervantes@eidolocal.es